Diagnóstico participativo da atención á saúde mental en Galicia

En 2025 desenvolvemos, por encargo de Feafes Galicia, un estudo pioneiro sobre a situación da saúde mental en Galicia, cun enfoque participativo. O obxectivo é recoller evidencias reais sobre as condicións de vida, o acceso aos servizos e as percepcións das persoas con trastorno mental e das súas familias, co fin de orientar a planificación das políticas públicas e mellorar os recursos de atención.

A metodoloxía combina análise documental, entrevistas a profesionais e entidades sociais, e dúas enquisas deseñadas especificamente para o proxecto: unha dirixida ás persoas usuarias e outra ás súas familias. A mostra abrangue a diversidade territorial e social do movemento asociativo galego, ofrecendo unha visión contextualizada das necesidades máis urxentes.

A análise dos datos permite identificar factores de vulnerabilidade estrutural, barreiras de acceso a dereitos sociais, desigualdades territoriais no sistema de atención e carencias na coordinación institucional. As conclusións serven como base para unha proposta de mellora que aposta polo reforzo da atención comunitaria, a incorporación plena do enfoque de dereitos e a participación activa das persoas afectadas nas decisións que lles incumben.

→ Un traballo que recolle as voces e experiencias das persoas para avanzar cara a un modelo de saúde mental máis humano, próximo e xusto.